دوایین رێگای پێوه‌ندی له‌گه‌ڵ ده‌ره‌وه, له زیندانیانی سنه داخرا

له به‌ر‌ده‌وامی تۆڵه سه‌ندنه‌وه له 60 نه‌فه‌ر مانگرتووه‌که‌ی زیندانی سنه, به فه‌رمانی مۆحه‌مه‌دخۆسره‌وی تێلێفۆنه‌کانی ئه‌و به‌ندیخانه‌یه داخران. به‌پێ نوێترین راپۆرته گه‌یشتووه‌کان, هه‌موو تێلێفۆنه‌کانی به‌ندیخانه‌ی ناوه‌ندی سنه داخراون و به‌و شێوه‌یه دوایین رێگای پێوه‌ندی زیندانیان له‌گه‌ڵ ده‌ره‌وه به‌سترا. له‌و جێگایه که مانگرتنی زیندانیان هه‌موو به‌نده‌کانی ئه‌و گرتووخانه‌یه‌ی گرتبووه‌وه, قه‌ده‌غه‌بوونی پێوه‌ندیه‌کان نه‌ک ته‌نیا به‌نده‌کانی پاکی 1 و 2 (به‌نده‌کانی تایبه‌ت به چالاکانی سیاسی و مه‌ده‌نی), به‌ڵکوو هه‌موو به‌نده‌کانی ئه‌و به‌ندیخانه‌یه‌ی گرتۆته‌وه. جێگای ئاماژه‌یه پاش راگه‌یاندنی مانگرتنی فه‌رمی له‌لایه‌ن 60 که‌س له به‌ندکراوانی به‌ندیخانه‌ی سنه‌وه که بۆ ماوه‌ی یه‌ک هه‌فته و بۆ ناڕه‌زایی ده‌ربڕین له دژی له‌سێداره‌دانی شه‌هید ئێحسان فه‌تاحیان به‌ڕێوه‌چوو, خۆسره‌وی (سه رۆکی به‌ندیخانه) به هاوکاری ئه مجه‌دی (دادستانی پێشووی سنه) په‌روه‌نده‌ی نوێی بۆ مانگرتووان کرده‌وه و هه‌ر له‌م پێوه‌ندیه‌دا چاوپێکه‌وتنی رووبه‌روو و مۆره‌خه‌سیان لێ‌قه‌ده‌غه کرا.